| تبليغات | X |
يازان: حوسئين اؤزگور
كوچه لرده يئل اسير
سازاق اتيمي كسير
آيريليقلار ايچينده
اؤلوم يامان تله سير
دومان داغي آليب دير
چيچك لر ساراليب دير
دئييرسن بس تبريزده
داها دؤزوم قاليب دير
سهند تبريزدن گئتدي
گئديب گؤزلردن ايتدي
ائل گولونون دؤشونده
آيريليق گولو بيتدي
تبريزيم آغلاييب، ساچلارين يولما
سهندين اؤلمه ييب،
ايگيدلر اؤلمز
سهندين اؤلومو هاميميزي سارسيتدي، آما هاميدان چوخ آنا تبريزين بئلين بوكدو. اييلمز تبريزين بئلين بالالاريندان باشقا كيم بوكه بيلر؟ كيم ساچلارين آغاردا بيلر؟ بوگون تبريز ياسلي دير. تبريزين ايگيد بالاسي سهندين يوخلوغونا يالنيز تبريز يوخ، بوتون آذربايجان اينانمير! سهند اؤلمه ييب، سهند ديريدير.
دوشونجه ميزين قارتاللاريلا ائل ذيروه سينده اوچوشدادير، بلكه ده قارانقوشلار قاييداندا قاييتدي! آما اينانين سهند داها يوخدور. مهير سهند اولسايدي بيز بوگونه قالارديق؟ يوخ! سهند بيزي اوزو گولر ايستردي، بيزده سهندي. آما نه سهند بيزي گولدوردو و نه بيز اونو تاپا بيلديك. "ياسلي ساوالاني" گؤروردوك و سهندين شنلي اولدوغونا سئوينيرديك، سهندده بيزي ياسلي ائله دي. بوگون بيز يوخ "سهند ياسلي"دير. گونشده باتدي، سهند يوخلوغونا اينانديق. سهندين باشينا ياغان قارلار اؤزوده آغاريب. آذربايجان اؤز قوينوندا سهند بالاسين ايتيردي.
بيليرسن مي آي سهنديم
گونش باتير
ساري يارپاق غاج آلتدا
باش تورپاغا قويوب ياتير
بيليرسن مي آي سهنديم
بوگون سنسيز گونش باتير
بيليرسن مي؟
يوخلوغونا گونش باتير
