| تبليغات | X |
ایتحاف اولونور اونودولماز سهندیمیزه:
او آجی اولایدان دوز بیر ایل کئچدی
آخشام چاغی دیر؛ گونش باتماق حالیندادیر. گونشین باتما زامانی دویغولو بیر زامان دیر. آما نه بیلیردیق کی بئلنچی بیر چاغدا عزیز دؤستوموزون یاشاییش شمعی نین سؤنمه خبری بیزه گلیب چاتاجاق و او آخشامی بیر حوزونلو آخشاما چئویره جک.
دوز بیر ایل بوندان اؤنجه بئلنچی بیر چاغدا سهندین دونیادان کؤچمه خبری منه گلیب چاتدی. "سهند بیر اتومبیل اولاییندا دونیاسینی دئییشدی". خبری ائشیتدیگیم زامان ائله بیر دونیا باشیما فیرلاندی. هئچ نه اینانا بیلمه دیم. اؤز اؤزومه دئدیم: بلکه خبر دوغرو دئییل، بلکه سهند هله ساغ دیر، بلکه، بلکه ...
آما یوخ، آجی خبر تئز یاییلار. بو آجی خبرده ائله بیل کی اؤز قارانلیغی ایله گونشین باتماسین نئچه ساعات تئزه سالدی.
اؤزومه گلن زامان آنلادیم کی خبر دوغرودور. کئچمیش ده کی خاطیره لر یادیما دوشدو. هر بیری اؤزونه گؤره نیشتره بنزه ییردیلر کی هم کؤنلومده او شیرین گونلری خاطیرلادیردی و همده بئلنچی بیر خاطیرالارلا و او خاطیره لرین بیر سببکارینین الدن گئتمه سین یادیما سالیب و کؤنلومه اود یاخیردی.
دوغرودان کی بو ایتگی نی یئنه اینانماق اولمور. ائله "ووقار نعمت" دئمیشکن:
سهند اؤلدومو!؟
یوخ اینانمایاجاغام بونا
بو اؤلومه اینانماق اؤلوم کیمی چتین دیر
من اینانمایاجاغام، ای دوست!
هئچ بیر دوست اؤلومونه
اؤزوم اؤله نه کیمی
سهندین چالیش مالاری سس سیز آما اؤز آدینین صاحیبی کیمی گوجلو ایدی. بو نا گؤره ده بو بیر ایلده یقین هر یئرده سهندین یئری بوش گؤرونوردی. او کیشی اؤز چالیشیقلاری ایله بیزه بونو ثابیت ائتمیشدیرکی گره ک هئچ زامان اؤز چالیشیقلاریمیزدان ال چکمه یه ک. آما بو بؤیوک دوستوموزون روحی یئنه بیزیمله دیر و بیز ایله یاشایاجاق و بیزده گره ک هر زامان سهندین آدینی و یادینی کؤنلوموزده ساخلایاق و دئیه ک: سهند، دوستلار سنی هئچ زامان اونوتمایاجاق لار.
سهند سن کؤنلوموزدن ده یوخاری، آذربایجان سماسیندا سؤنمز بیر اولدوز اولدون.
آیتان تبریزلی (آذراوغلو)
۱۷/۱۲/۱۳۸۵
